Croquetas de xamón e Queixo San Simón Afumado.

A receita infalible para que che saian no seu punto

Notas de interese / Consellos

A quen non lle gustan as croquetas? Propómosche un clásico: As croquetas de xamón, acompañadas dun dos nosos produtos máis especiais de Queixería Larsa e máis cómodos polo seu formato en taco, listo para cortar: O Queixo San Simón Afumado en taco. A receita non obstante, permite mudar estes ingredientes case por calquera outro e facer croquetas de pito, de peixe, de espinacas, só de queixo… Elixe as túas e segue lendo, Non te arrepentirás!

Alérxenos

Lactosa, Ovo, Glute
larsa img

Ingredientes

Elaboracion

En Larsa levamos moitos anos entrando nas cociñas galegas e sabemos que as croquetas son un clásico francés que fixemos noso con ingredientes tan de aquí coma o lacón con grelos. Mmmm! Hoxe en día, unha boa croqueta é unha arte e moito se fala sobre cal é a receita de croqueta perfecta. Pois imos desvelarcha con algúns segredos para que che saian sempre boísimas e no seu punto: Crocantes por fóra e apetitosamente cremosas por dentro. Non o crees? Ben, é verdade que o punto da bechamel esixe certa práctica, pero seguindo os nosos pasos non deberías ter problema algún. Imos aló!

Pica ben fina a cebola en taquiños, o que agora coñecemos como brunoise, mentres pos unha tixola ampla coa manteiga ao lume suave, para que se vaia derretindo. Non deixes que ferva nunca!

-Doura a cebola a lume lento uns 8 minutos, sen que chegue a queimarse e retíraa da manteiga. Engade o xamón en tacos, tamén ben finos, e deixa que se refoguen a lume lento uns 5 minutos removendo de cando en vez sen que cheguen a endurecerse.

Sen subir o lume, engade a fariña, mellor se está peneirada previamente. A partir de agora, non deixes de remover a mestura cun batedor de baleas. Cociña a fariña durante uns 7 minutos para evitar que as túas croquetas saiban só a fariña.

Cando xa teñas esa primeira pasta, co lume baixo, vai engadindo aos poucos o leite, sen deixar de remover co batedor. Primeiro, unha parte suficiente para integrar toda a fariña e logo, aos poucos para ir aumentando a masa. O importante para que non se formen grumos é que esa pasta vaia engordando co leite, que non teñas nunca un mar branco e líquido bañando unha pasta dura.

Continúa co proceso ata esgotar o leite e sen deixar de remover. Agora é o momento de engadir un chisco de sal, aínda que logo terás opción a rectificar tendo en conta o sal que levan o xamón e o queixo.

Sube progresivamente o lume, a bechamel terá que chegar a ferver e cocer. Sen deixar de remover en ningún momento, deixa que a masa espese.

Engade o Queixo San Simón Afumado en taco, con Leite de Pastoreo, integrándoo na masa xa quente e continúa removendo ata que obteñas unha bechamel perfecta. Como sabelo?

Cando a bechamel está no punto de espesor que precisan as croquetas, e ferve, as burbullas que se forman son gordas, do tamaño dunha abelá. Outro signo é o que che custará remover a masa co batedor de baleas e que se xuntas a masa na parte central da tixola, tende a manterse. De feito, verás que a podes despegar do fondo con facilidade, deixándoo case limpo.

Se chegaches a este punto, estende a masa das croquetas nunha fonte plana. Agora é o momento de agardar polo menos 3 horas a que arrefríe e solidifique ben. Podes esperar a darlle forma ás túas croquetas ao día seguinte ou mesmo conxelar a masa. Para iso, cúbrea cun filme ben pegado á masa para que non se humedeza.

Á hora de formar as croquetas podes axudarte de dúas culleres grandes ou darlle forma coas mans. O mellor é que antes de tocalas impregnes os anacos de masa en pan relado para evitar que se che peguen ás mans. Dálle forma as túas croquetas, rebózaas en ovo e dálle unha última capa de pan relado antes de fritilas.

Frite en aceite ben quente (sen fumexar) e suficiente para que practicamente as cubra. Así evitarás que abran. Déixaas escorrer en papel de cociña e gózaas en canto deixen de queimar. Son ou non perfectas?