A graxa dos lácteos: Desmontando mitos

Os produtos lácteos como o leite, os iogures ou o queixo son alimentos primordiais na nosa alimentación. Achégannos numerosos nutrientes ao noso organismo, como proteínas de alto valor biolóxico, hidratos de carbono, vitaminas, minerais e… Graxas!

O consumo de graxas é tan importante na alimentación como o son as proteínas, carbohidratos e o resto de nutrientes.

Aínda así, son moitas as dúbidas e os mitos que circulan ao redor das graxas e o seu consumo nos lácteos.

Que nos achega a graxa do leite?

A graxa que obtemos a partir dos lácteos ten numerosas funcións no noso organismo e achéganos:

  • Vitaminas liposolubles como a A, D, E e  K (as graxas serven como vehículo para estas vitaminas)
  • Triacilglicéridos (TAG, compoñentes maioritarios da graxa do leite)
  • Ácidos graxos saturados.
  • Ácidos graxos de cadea curta (AGCC), destacando o ácido butírico.
  • Ácidos graxos de cadea media (AGCM).
  • Ácidos graxos insaturados, como ácido oleico (monoinsaturado), ao redor do 3 -5% da graxa do leite serían ácidos poliinsaturados ( AGPI), en cuxa fracción está incluído o ácido  linoleico e o ácido linoleico conxugado (CLA).

Beneficios do consumo de graxa nos lácteos

Entre os beneficios da graxa nos lácteos podemos atopar:

  • Fonte de enerxía: Por cada gramo de graxa podemos obter 9  kilocalorías de enerxía.
  • A nivel metabólico: Intervén nos procesos de síntese hormonal.
  • Os glóbulos de graxa dos produtos lácteos están rodeados por unha membrana que inflúe positivamente na súa dixestibilidade e absorción.
  • As proteínas lácteas inflúen positivamente na absorción intestinal da graxa.

A graxa láctea constitúe unha fonte natural de compostos bioactivos (ácido butírico, ácido linoleico conxugado (CLA), fosfolípidos e esfingolípidos).

De igual forma, as graxas son precursoras para a síntese de compostos anti e proinflamatorios, ademais de achegarnos ácidos graxos esenciais (aqueles que o ser humano non pode sintetizar).

Desmontando os mitos sobre a graxa nos lácteos

Cada vez é máis sinxelo atopar recomendacións sobre como reducir a inxesta de lácteos, pero non hai razóns para excluír o consumo de graxa láctea da dieta de forma xeneralizada a toda a poboación.

Destaca cada vez máis a importancia de centrarse no conxunto da alimentación diaria á hora de facer recomendacións de inxesta, en lugar de centrarse nos nutrientes individuais, como son, por exemplo, as graxas saturadas.

Está demostrado cientificamente, que a graxa do leite non se asocia con enfermidades cardiovasculares en individuos sans. Hai evidencias que reflicten un carácter protector sobre estas. 

O consumo de leite é importante no día a día, xa que sen produtos lácteos sería moi complexo conseguir as cantidades diarias recomendadas dalgúns nutrientes, como o calcio.

Larseiro, agora que xa o sabes todo sobre as graxas dos lácteos… Queres descubrir todo sobre as propiedades dos iogures? No noso post do blog tes todos os detalles.

pastoreo Larsa