Lácteos e embarazo: Todo o que precisas saber

Durante o embarazo xorden numerosas dúbidas ao redor do que se pode consumir e que alimentos son os máis beneficiosos para o organismo. Neste sentido, os lácteos son sempre unha gran incógnita e a proba está nas preguntas que recibimos por parte das nosas Larseiras.  

Hoxe queremos aclararvos que o consumo de lácteos non só é apto durante o embarazo, senón que é recomendable. Queredes saber por que? En Larsa contámosvos todo o que precisades saber!
 

Beneficiosos para o organismo 

Os lácteos son alimentos cunha alta densidade nutricional grazas ao seu contido en vitaminas, minerais, proteínas de alto valor biolóxico, graxas e hidratos de carbono.  

En termos xerais, unha inxesta recomendada de lácteos está asociada con melloras en moitas funcións fisiolóxicas. Entre elas podemos destacar unha mellora na regulación do peso corporal, o fortalecemento da nosa saúde muscular, así como a posibilidade de reducir o risco de padecer certas enfermidades.

 

Calcio: Un factor importantísimo  

No caso concreto dos minerais, os lácteos xogan un papel fundamental e é que neles está presente o calcio, un macromineral importantísimo para o corpo humano.  

Entre as súas funcións atópase o fortalecemento dos ósos, a coagulación do sangue, o envío e recepción de sinais nerviosos e o mantemento dun ritmo cardíaco normal. Numerosos estudos demostraron que a inxesta de calcio durante o embarazo favorece o desenvolvemento fetal e do recentemente nado, así como a protección da masa ósea materna.

 

Non valen todos os lácteos 

Durante a xestación, debemos consumir unicamente aqueles produtos lácteos que foron sometidos a un tratamento térmico que elimine calquera tipo de microorganismo patóxeno situado no leite. 

 Este tratamento térmico pode ser: pasteurización ou esterilización. Dous tratamentos que garanten as perfectas condicións de conservación do alimento, fundamentais para garantir o consumo humano e evitar enfermidades como a brucelose ou a listeriose.  

– Pasteurización: Proceso tecnolóxico que consiste en someter ao leite a un tratamento térmico, mantendo as características nutritivas e sensoriais do leite.  

– Esterilización: Tratamento que somete ao leite a temperaturas máis elevadas durante tempos máis curtos. A pesar de que mantén as características sensoriais e nutritivas do leite, esta sofre pequenas alteracións nas concentracións dalgúns ingredientes. O resultado? Un produto máis estable e seguro cun longo período de conservación. 

Evita o leite cru

A pesar de que, polo xeral, todos os lácteos que se comercializan no supermercado son aptos para consumo humano, a realidade é que se debe revisar a súa etiquetaxe no momento da compra.  

O leite que se debe evitar é aquel que non se someteu a un tratamento térmico, tal e como ocorre co leite cru. A nosa recomendación é que evites calquera produto elaborado con este tipo de leite, como, por exemplo, algúns queixos que atoparás no supermercado. 

  

Cantidade recomendada de lácteos 

Sabías que as necesidades nutricionais dos lácteos varían dependendo da idade e a etapa da vida? Así é. En función destes dous valores, a inxesta recomendada dos lácteos variará.  

Durante o embarazo, a alimentación das nais é realmente importante, polo que debe ser controlada antes e durante a xestación. É a mellor maneira de favorecer e garantir un bo estado de saúde materno – infantil.  

Neste caso, recoméndase aumentar o consumo diario de produtos lácteos a 3- 4 racións ao día. Unha ración de leite equivale a un vaso de leite (250ml), 2 iogures, 40 g de queixo magro ou 80g de queixo fresco. Como adiantabamos ao comezo deste post, o consumo de lácteos durante o embarazo xoga un papel importantísimo debido á súa achega de vitaminas, minerais, proteínas, graxas e hidratos de carbono. Alimentos moi completos con grandes beneficios para a saúde!  

En Larsa elaboramos todos os nosos produtos con Leite de Pastoreo 100% Galega, cumprindo cos máximos estándares de calidade e seguridade. O Pastoreo é o ser e facer de Larsa, un modelo natural asentado na tradición de Galicia, que consiste en alimentar ás vacas como se fixo sempre, ao aire libre, nos pastos. Consumir os nosos produtos é gozar do sabor a leite de toda a vida!
 

809