Algunha vez oíches falar da receita de Bandullo Galego? Aínda que é unha sobremesa cunha larguísima tradición en Galicia, e especialmente nas zonas de Caldas de Reis e a península do Morrazo, é tan pouco coñecida que hai quen apunta que estivo a piques de desaparecer. O seu nome provén segundo a Real Academia Galega da súa elaboración, xa que antigamente era unha sobremesa de pan, ovos e outros ingredientes que se cocía dentro do estómago ou bandullo do porco. Quizais por isto, nalgúns lugares de Galicia esta receita de aproveitamento está asociada á matanza, pero en moitas casas é tradicional de Entroido ou Pascua. A elaboración é sinxela e o resultado é similar aos pudings ingleses; nós apostaremos pola receita máis tradicional, con piñóns e pasas, pero podes preparala con noces ou outros froitos secos.
Alérxenos
Leite, ovos, glute
Que produtos de Larsa precisas para facer a receita?
Para comezar co Bandullo quenta o leite a lume medio nun cazo ou recipiente amplo sen que chegue a ferver.
Mentres, curta o pan en anacos pequenos e refuga a cortiza se é moi dura. Retira o leite do lume, engade o pan partido e mergúllao ben.
Agrega o azucre, a manteiga, remove ben e reserva uns minutos. Rela o limón, engádeo e esparexe a canela sobre a mestura.
Bate ben os ovos e vérteos sobre o pan remollado. Mestura ben con axuda dunha espátula ou un garfo para esmigallar o pan, xa brando.
Engade os piñóns e as pasas e volve remover ata obter unha mestura uniforme.
Engraxa con manteiga un molde preferiblemente redondo apto para forno, esparexe un pouco de fariña sobre o fondo e as paredes e verte a masa do bandullo.
Introduce o molde noutro máis profundo con auga para lograr unha cocción ao baño maría.
Prequenta o forno a 190º con calor arriba e abaixo durante 5 ou 10 minutos.
Introduce o molde coa auga e o do Bandullo dentro e deixa cociñar uns 45 minutos a partir de que a auga do baño maría comece a ferver.
Proba cun coitelo ou escarvadentes se o teu Bandullo está listo. Se tras picalo no centro, sae limpo, podes retiralo do forno.
Agarda a que o Bandullo arrefríe completamente antes de desmoldar e servir. É ideal como sobremesa de Entroido ou para acompañar un café a media mañá ou media tarde.
