Ai, as canas de crema fritas do Carballiño! Só de nomealas xa se abre o apetito, e non é para menos 😉. Esta sobremesa ourensá ten o que hai que ter: unha masa fina e crocante por fóra, crema suave por dentro e un sabor que nunca falla. No Carballiño prepáranas co mesmo agarimo de sempre, e nótase: cada día as pastelarías fan alí milleiros delas e sempre igual de boas. Non hai truco, só moito mimo e a tradición de toda a vida. Unha sobremesa doce, crocante e con ese punto que sempre engancha. A que non podes comer só unha?
Alérxenos
Ovos, leite, glute.
Que produtos de Larsa precisas para facer a receita?
Para comezar coas túas canas de crema do Carballiño, hai que facer a masa. Xunta nun bol grande a fariña, a reladura de limón, o sal e a auga morna. Engade un pouco de aceite de oliva e mestura cunha culler de madeira ata obter unha masa firme que non se pegue ás mans.
Unha vez lista, coloca a masa sobre unha superficie enfariñada e amasa durante uns 10 minutos, ata que estea elástica e homoxénea. Ao rematar, forma unha bóla, cúbrea cun pano e deixa repousar na neveira durante 1 hora.
Pasado ese tempo, estira a masa cun rolete ata deixala o máis fina posible. Corta tiras finas duns 2 a 3 mm de ancho e enrólaas sobre canutiños metálicos ou canas tradicionais. Reserva.
Para facer a crema, quenta o Leite enteiro de Pastoreo Larsa coa vaíña de vainilla aberta, a pel do limón e a rama de canela ata case ferver. Retira do lume e deixa infusionar 10 minutos.
Mestura nun bol as xemas co azucre ata obter unha crema espumosa. Engade o amidón de millo e un pouco do leite infusionado. Coa o leite para eliminar peles e canela e vérteo sobre a mestura de xemas.
Cociña a crema a lume lento, removendo sen parar cunhas variñas ata que espese. Retira do lume, remexe un minuto máis e deixa temperar. Garda na neveira cuberta con papel transparente para que non forme codia.
Mentres tanto, frite as canas: quenta abondoso aceite de oliva suave e frite as canas enroladas ata que estean douradas por todos os lados. Retíraas sobre papel absorbente.
Cando arrefríen lixeiramente, extrae con coidado os canutiños ou as canas. Han saír facilmente grazas ao aceite.
Reboza as canas. Bota o azucre nun prato fondo e pasa as cañas fritas pola mestura para cubrilas ben.
Para encher as canas, introduce a crema pasteleira fría nunha manga pasteleira e éncheas polos dous extremos ata que queden ben abundantes.
Coloca as canas de crema nunha fonte ampla e, se queres, bótalle un pouco máis de azucre por enriba. E listo! Sérveas xusto ao rematalas, coa crema fresca e a masa ben crocante.
