Hai quen opina que a Rosca de Pascua, a Mona de Pascua e o Pan de Ovo popular en Carballo (A Coruña) son a mesma cousa, pero se es un #larseiro larpeiro é posible que as teñas probado e non esteas de acordo. A nós pásanos igual!
As tres son sobremesas típicas de Pascua, e as tres están marcadas pola tradición que aínda se mantén en moitas zonas de Galicia: Son os agasallos que os padriños fan aos seus afillados o Domingo de Pascua, en orixe, para ter con que festexar o fin do recollemento asociado á Coresma e as súas limitacións alimentarias. Como non ía celebrarse algo así cun festín gastronómico? Estamos en Galicia!
Mesmos ingredientes, distinto resultado
Algo de certo hai en que a Rosca de Pascua, a Mona de Pascua e o Pan de Ovo teñen semellanzas. Comparten algúns ingredientes básicos, como a fariña, o fermento, a manteiga, o azucre ou os ovos… E tamén a forma de amasar: Envolvendo de fóra cara dentro ao comezo e, cando a masa é tan consistente que se che pega ás mans, facendo forza coa parte baixa das palmas das mans, nunca cos dedos, e dando voltas á masa coma se lavásemos unha peza de roupa a man, pero con tento.
Nos tres casos, o método é importante, tanto como deixar levedar ben a masa, pero logo teñen as súas variacións e dentro de cada sobremesa, hai moitos segredos de cociñeiro que fan que en cada casa saiban e teñan un aspecto diferente.
Imos aló coa receita de Pan de Ovo. Non imos negar que ten a súa dificultade, pero o que máis falta fai é tempo, así que imos estar un bo cacho entretidos.
Ingredientes do Pan de Ovo
9 ovos
1,5 quilos de fariña de forza
375 gramos de Manteiga Tradicional Larsa
100 gramos de fermento fresco
375 gramos de azucre
A pel de medio limón relada
1\2 vaso de anís
1\2 vaso de Leite Enteiro de Pastoreo Larsa
Envorca a fariña sobre a superficie de traballo e dálle forma de volcán. Reserva unha presa para o amasado, se queres, pero non engadas máis fariña á masa da que che marcamos na receita ou o resultado será distinto.
Desfai o fermento en medio vaso de Leite Enteiro de Pastoreo Larsa morno e déixao repousar 15 minutos. Mentres, mestura os ovos, o limón relado, o anís e o azucre. Ten en conta que todos os ingredientes deben estar a temperatura ambiente. Agrega dentro do volcán o leite e o fermento e intégrao coa fariña. Logo debes verter o resto dos ingredientes mesturados.
Primeiro podes ir mesturando aos poucos a fariña cos líquidos cunha espátula de madeira desfacendo pouco a pouco o volcán desde dentro e en movementos circulares cara fóra, ata que a masa vaia engordando e faga falta meterlle man. É o momento de engadirlle a fariña que reservaramos e de amasar como che indicamos máis arriba.
O amasado e a temperatura, o máis importante
Amasa durante 2 ou 3 minutos e deixa a masa descansar outros 10. Logo volve traballar a masa durante uns minutos máis ata que se despegue da mesa con facilidade. Envólvea nun pano de cociña limpo e seco e colócaa dentro dunha cesta ou dunha almofía de plástico.
Debes deixar a masa descansar durante unha noite sen correntes de aire e a unha temperatura de polo menos 20 graos para que levede. Repite o amasado e volve deixala levedar outras 8 horas tapada e envolta no pano. Cando volva crecer, é o momento de darlle a forma trenzada facendo 3 bólas de masa e estirándoas en tiras que unimos dun lado para despois trenzar.
Nese momento tes que deixar que o Pan de Ovo volva levedar outras 8 horas á mesma temperatura, tapado e apartado das correntes. Decórao con ovo batido e améndoa antes de enfornar.
O Pan de Ovo debe cocerse durante 30 minutos a 180 graos. En canto pasen os primeiros 10, o seu cheiro invadirá a túa cociña, pero, non abras o forno ata que estea cocido! Podes comprobar o seu punto cun escarvadentes.
Esta é unha receita tradicional, cos seus tempos de levedado, pero hai quen os acurta metendo a masa no forno previamente quentado. Calquera método é bo se ves que a masa dobra o seu volume en cada unha das 3 fases.
Mona de Pascua
Como podes ter deducido, o Pan de Ovo debe o seu nome ao peso que teñen os ovos na receita, pero a Mona de Pascua non queda atrás, sobre todo polos ovos cocidos que leva sobre a masa. Estes son os ingredientes:
120 ml de auga
Unha noz de fermento prensado
Unha culleradiña de anís
50 gramos de Manteiga Tradicional Larsa
175 gramos de azucre
750 gramos de fariña de forza
1/2 culleradiña de sal
4 ovos
8 ovos cocidos con casca
O procedemento é similar ao do Pan de Ovo, pero cambia o final, cando teremos que dar á masa unha forma de roda e cambiar o decorado polos ovos cocidos, que asentaremos sobre a masa antes de metela no forno.
Rosca de Pascua
A Rosca de Pascua é tradicional en toda Galicia, e especialmente no sur, onde a tradición dos padriños tamén está moi viva. O amasado e levedado non mudan das dúas sobremesas de Pascua anteriores, e como no caso da Mona de Pascua, á Rosca dáselle forma de roda. Os ingredientes son os seguintes:
880 gramos de fariña de forza
6 ovos de curral
160 gramos de azucre
80 gramos de manteiga de vaca derretida ou Manteiga Tradicional Larsa
A pel dun limón relada
A pel dunha laranxa relada
Zume de 1\2 laranxa
25 gramos de fermento fresco
2 culleradas de esencia de anís
9 gramos de sal
125 gramos de Leite Enteiro de Pastoreo Larsa
Anímaste a meterte na cociña e lembrar aos teus padriños ou afillados? Tes onde elixir e xa sabes, non hai como cociñar para darse unha homenaxe.
