Como facer a mellor receita de arroz con leite caseiro

Clásico, cremoso e ideal para calquera día. E sempre con Leite de Pastoreo!

Notas de interese / Consellos

Se algunha vez preguntácheste como facer arroz con leite, hoxe traémosche a solución. A mellor receita de arroz con leite caseiro, doado e rápido de preparar. Pero como todas as receitas, ten os seus segredos e neste caso, son un par de detalles para non enlearte na cociña. O primeiro, que che imos a dicir nós!, é o leite. Para que che saia un arroz con leite caseiro e cremoso, debes usar un leite con toda a súa graxa, así que neste caso, non substitúas o Leite de Pastoreo Enteiro Larsa polo Desnatado ou Semi. O segundo gran erro nunha receita de arroz con leite é que se pegue. É fácil de facer pero precisa aloumiños, remove cada 5 minutos ao principio e cando lle engadas o azucre, non soltes a culler ata o final.

Alérxenos

Lactosa
larsa img

Ingredientes

  • 1  l. de Leite de Pastoreo enteiro Larsa
  • 150 g. de arroz redondo ou bomba
  • Cortiza dun limón
  • 2 ramas de canela
  • 6 culleradas de azucre
  • Canela en po para decorar

Elaboracion

O arroz con leite é unha desas sobremesas imprescindibles na nosa gastronomía e quizais por iso, ten moitas variacións. Segundo algunhas referencias, a súa orixe está no sur de España, pero témolo tan asociado ás comidiñas da avoa que semella que o inventaramos aquí. Verdade? Tanto que ata lle puxemos 3 nomes! Si, si. A tradicional receita de arroz con leite caseiro coñécese tamén como arroz doce ou papas de arroz, e con seseo nalgunhas zonas de costa! ( arrós). Chamelo coma o chames, queremos compartir contigo os trucos e os pasos que fan desta a mellor receita de arroz con leite caseiro; tradicional, meloso e co punto ideal de azucre. Somos conscientes da enorme competencia que temos e probablemente sigas pensando que o da túa nai ou a túa avoa son insuperables, pero hai que ir aprendendo para coller o relevo. Non crees? Verás que sinxelo!

Antes de nada, lava lixeiramente o arroz. En contra do aconsellado nalgunhas receitas de arroz con leite, para que sexa meloso, necesitamos todo o amidón do arroz, así que só un pouco de auga e listo.

Pon unha pota ao lume co leite frío, as ramas de canela, a cortiza de limón (limpa da parte branca) e o arroz xa lavado.

Mantén o lume baixo e deixa cocer por 40 ou 45 minutos. Debes ter coidado de que o leite non se pegue, por iso é importante remover cada 4 ou 5 minutos e manter o lume baixo.

Pasado este tempo, o arroz terá xa unha textura melosa. Se non é así, podes engadir un pouco máis de leite e deixar cocer 10 minutos máis. Ás veces, as cociñas de gas e as vitrocerámicas teñen tempos diferentes.

Coa textura xa melosa, é hora de incorporar o azucre. Terás que deixar cocer entre 10 e 15 minutos máis, sempre a lume lento e agora sen deixar de remover.

Apaga o lume, retira o limón e as ramas de canela e envorca o contido da pota nunha fonte profunda para repousar sen perigo de que se pegue. A calor acumulada no arroz vai manter durante un tempo o seu cocción, e se o deixas na cazola, corres perigo de arruinar a túa receita.

Se o prefires, podes servir o arroz con leite en cuncas individuais. Será especialmente útil se a alguén na túa casa gústalle quente e prefire non agardar.

Bota canela moída por riba do teu arroz con leite e deixa arrefriar a túa fonte ou fontes de arroz con leite caseiro na encimera da cociña ata a hora de servir. E se aguantas o arrecendo!

Se na túa casa gústavos ben frío, é mellor que o fagas o día antes para arrefriar a fonte totalmente antes de metela no frigo. Non a metas quente!