Empanada de raxo con queixo

Como entrante ou prato principal, unha receita que non pode faltar nos nosos veráns... nin invernos

Notas de interese / Consellos

A masa da empanada é moi fácil de facer se tes en conta as normas da temperatura: O fermento debe estar no frigorífico ata que a usemos, logo debe mesturarse con auga morna, pero non quente e no levedado a masa debe permanecer a unha temperatura estable (uns 35 graos). Con estes consellos e os nosos pasos non debes ter problema para facer unha Empanada de Raxo e Queixo de Tetilla con D.O. perfecta. Imos aló?

Alérxenos

Glute, Ovo, Lactosa

Que produtos de Larsa precisas para facer a receita?

Queixo Galego con D.O. Tetilla

Ingredientes

Para o recheo:

450 g. raxo de porco xa adobado con allo.
90 g de Queixo de Tetilla con D.O. Larsa
1 pemento vermello
1 cebola ben grande ou 2 medianas
1 chorriño de coñac ou similar
3 dentes de allo
1 tomate ben maduro
Aceite de Oliva Virxe Extra
Sal
1 ovo batido para pintar e dourar a empanada

Para a masa:

400 gramos de fariña de forza
40 gramos de fermento de panadaría fresco prensado
200 ml de auga
150 ml aceite do refrito

Elaboración

A empanada é unha receita vencellada ao verán, a esas festas populares e reunións que repetimos cada ano, aos picnics na praia ou o campo e o complemento ideal para sardiñadas e churrascadas coas que nos gusta celebrar o inicio da estación marcado polo solsticio de verán. En realidade, ten tantas posibilidades e posibles recheos que a comemos todo o ano, como pouco, unha vez a mes, ou non? Así que non podía faltar este clásico no noso receitario #Larseiro. Si, comemos empanada de case todo, pero en Larsa decantámonos por esta receita con raxo e Queixo Tetilla con D.O. Larsa, porque xa que imos celebrar que chegou o verán, facémolo ao grande, con 2 ingredientes fundamentais da nosa gastronomía, o raxo e o Queixo de tetilla D.O. Larsa que podes substituír por Queixo O Pazo en taco, elaborado con Leite de Pastoreo. Porque as cousas boas sempre estarán aí!

Empezaremos por preparar o refrito para logo poder engadir o seu aceite á masa. Poñemos ao lume unha tixola cun chorriño de aceite e deixamos quentar ben antes de engadir o raxo, xa adobado con allo. Fritimos durante uns 5 minutos removendo en metade do proceso para dourar a carne por todos lados.

Inmediatamente despois, engadimos o coñac e deixamos que se reduza outros 2 minutos. Retiramos do lume e reservamos. Non importa se a carne non está do todo cociñada, logo recibirá suficiente calor.

Cubrimos o fondo doutra tixola, máis ampla con Aceite de Oliva Virxe Extra e poñémola ao lume mentres picamos ben, en láminas regulares, a cebola e o allo para refogalos ben.

Cortamos o pemento, primeiro en tiras dun dedo de largo e logo, en dados do mesmo tamaño, unímolo ao refrito e deixamos refogar uns 5 minutos máis. Agregamos e unímoslle o raxo xa cociñado. Retiramos o aceite que necesitamos para elaborar a masa. Por último, picamos ben o tomate e engadímosllo ao refrito. Deixamos cociñar todo tapado durante 10 minutos, rectificamos de sal e apagamos o lume.

É o momento de poñerse coa masa. Para iso, peneiramos a fariña de forza e colocámola nun bol amplo. Facemos un oco no medio. Sacamos o fermento da neveira e o vertemos nun bol coa auga amornada, pero nunca por encima de 45 graos. Esperamos uns minutos e disolvémola ben. Logo engadimos a auga dentro do oco da fariña.

Imos mesturando aos poucos auga e fariña con movementos circulares do centro do bol ao exterior. Cando teñamos a auga ben disolta na fariña eo fermento, engadiremos o aceite e o sal.

Chegou a hora de estender un pouco de fariña sobre o mesado da cociña para traballar a masa coas mans. Amasamos coas mans e os dedos desde o centro cara a fóra durante uns 15 minutos. Podemos descansar uns 5 minutos no medio do proceso.

Cando teñamos unha masa elástica pero que xa non se pega ás mans, formamos unha bóla e tapámola cun pano lixeiramente humedecido para deixala levedar. Precisaremos unha hora de paciencia e que a masa estea a uns 35 graos e nunha zona sen correntes.

Se o fixemos ben, a masa terá duplicado o seu volume. É hora de amasala lixeiramente para quitarlle o aire e partir a bóla en 2, un anaco para a base, e outro, para a cuberta.

Estenderemos unha das bólas dándolle a forma do noso molde, redondo ou rectangular. Engraxamos a nosa fonte lixeiramente para evitar que a empanada se peque. Colocamos enriba dela a masa xa estendida, non só non importa que desborde, senón que convén. Distribuímos o recheo sobre a masa, deixando espazo nos bordos para selar a empanada e cubrímolo con Queixo de Tetilla Larsa. A continuación cubrimos coa outra parte da masa ben estendida. Dobraremos cara a dentro a parte sobrante da masa base para formar os bordos da empanada.

Abrimos un oco no centro da masa para que salga a calor durante o cociñado, pintamos a superficie co ovo batido e metémola no forno previamente prequentado a 180 graos. Deixamos que se coza durante uns 45 minutos e con calor por arriba e abaixo ata que estea ben dourada. Que a goces!

1314