A receita máis auténtica de Filloas de Entroido

Un clásico do inverno que nos encanta doce pero tamén podes encher de salgado

Notas de interese / Consellos

As filloas son a sobremesa entroideira por antonomasia en Galicia, aínda que tamén adoita prepararse cando comeza o inverno, asociado á matanza. Quizais tamén por iso, pódense preparar con sangue ou con caldo en lugar de leite e enchelas con algún alimento salgado. Un clásico, por exemplo, son as filloas recheas de grelos con chourizo, pero ese é outro cantar!

Alérxenos

Leite Glute Ovo
larsa img

Ingredientes

Elaboracion

Á fin chegou o Entroido, a festa máis divertida do inverno galego e na que, como non!, dámosnos á boa mesa, ás reunións de amigos e familiares e celebramos o sentido do humor, a retranca e a ironía. Non sendo de orixe puramente galega, é unha festa que ben podiamos ter inventado por aquí. E é que a orixe do Entroido remóntase ao imperio Sumerio e ten antecedentes na civilización exipcia e na romana. Como xa saberás, é unha festa pagá, pero coincide no tempo cos días previos á Coresma, que comeza co Mércores de Cinza.

Nun bol amplo, mestura o Leite Enteiro de Pastoreo Larsa, a auga, os ovos, o anís se decides engadilo, o sal e a manteiga derretida pero non quente. Báteo todo cunha batedora

Tamiza a fariña e vai engadíndoa aos poucos a medida que a integras no líquido sen que se formen cadabullos

Unha vez feito o amoado, que é como se chama esta pasta, déixao repousar durante unha hora para que espese. É importante remover o amoado antes de comezar facelas na tixola. O amoado debe ser líquido. Se ves que engordou demasiado, podes engadir un pouco máis de leite ou auga

A mellor proba de se fai falta unha rectificación, será a primeira filloa que fagas, que normalmente é para quen a cociña, e serve non só para saber se están no seu punto de sal e fariña, senón para regular a temperatura

Pica o touciño cun garfo e pon a tixola ou filloeira ao lume. Frega o touciño sobre a superficie para engraxala

Antes de comezar coas filloas, quenta ben a tixola ou filloeira e prepara o prato no que amorearás as filloas ou freixós

Enche o cullerón de amoado e empeza a verter o seu contido sobre a tixola ou filloeira aos poucos, ata cubrir toda a superficie cunha capa fina

Deixa que se cociñe ata que os bordos empecen a despegarse, terás que agarrar a filloa por eses extremos coas dúas mans para darlle a volta sen queimarte

Tamén podes utilizar unha espátula ou a tapa dunha tixola ben engraxada para evitar que se pegue. Pero a mellor maneira son as túas mans, verás que é doado non queimarse

Unha vez probada esa primeira filloa (ás veces fan falta 2 ou 3) e axustada a liquidez da masa e a temperatura, só terás que repetir a operación e amorear as filloas nunha nun prato

Logo poderás enchelas con nata montada, chocolate, compota de froitos vermellos ou calquera outra combinación doce. Nós recomendámosche a versión tradicional: Botarlle azucre ou verter un pouco de mel, envolvelas e... A gozar!