Esta torta de améndoa e mazá está inspirada na tradicional Torta de Santiago, iso si, cunha sorpresa que non deixará indiferente a ningún larseiro 😉. No seu interior agóchase unha capa de mazá que unida ao sabor doce da améndoa creará unha torta súper zumarenta e refrescante. É unha receita fácil e rápida que podes elaborar en pouco máis dunha hora e que che sorprenderá en sabor e textura, ademais a frescura que lle achegan as mazás é perfecta, tanto para celebrar o Día de Galicia e do Apóstolo Santiago como para calquera outro momento do ano. Tes o mandil posto?
Alérxenos
Ovos, lácteos, glute, améndoas.
Que produtos de Larsa precisas para facer a receita?
Lava, pela e corta en láminas finas todas as mazás e reservaas para máis adiante.
Prequenta o forno a 180º con calor por arriba e por abaixo e sen ventilador.
Nun bol grande, verte a manteiga a temperatura ambiente xunto co azucre. Bate cunhas varas ata conseguir unha textura cremosa.
Engade os ovos e a esencia de vainilla e continúa batendo ata que se integre todo. Agora, engade o iogur natural Larsa e mestura con suavidade coa axuda dunha espátula ata que se incorpore co resto dos ingredientes.
Noutro recipiente, xunta a fariña e o fermento e remove para combinalos ben. Coa axuda dun coador, peneira esta mestura sobre a preparación anterior e integra todo con suavidade coa axuda dunha espátula de silicona ata acadar unha masa uniforme.
Para montar a torta de améndoa e mazá, engraxa os bordos dun molde redondo cun pouco de Manteiga tradicional Larsa para evitar que a masa se pegue ás paredes. Forra a base do mesmo molde con papel para enfornar para que evitar que se pegue ao desmontar.
Verte a metade da mestura no molde e alisaa cunha espátula. Logo, coloca as láminas de mazá que cortaches ao comezo, creando unha nova capa.
Engade o resto da mestura sobre as mazás e aplana a superficie para decorala ao teu gusto coas améndoas laminadas.
Introduce a torta de améndoa e mazá no forno durante 50 minutos a 180º ata que acade un ton dourado. Pica a torta cun escarvadentes para saber se está lista, se non sae limpo, déixaa no forno 10 minutos máis.
Unha vez feita, retira a torta do forno e déixaa arrefriar. Mentres se tempera, debuxa e recorta nun anaco de papel a Cruz característica da Torta de Santiago.
Unha vez fría, coloca a Cruz de Santiago no centro da torta de améndoa e mazá e cubre a superficie con azucre glas.
Por último, retira o recorte da cruz con moito coidado para non tirar o azucre depositado enriba e… listo! Goza desta torta de améndoa e mazá inspirada na tradicional Torta de Santiago. Que aproveite!
