Poucas cousas poden compararse coa sensación de comezar o día tomando un bo capuchino recentemente feito, coa súa escuma suave e cremosa mesturándose perfectamente co café. Ademais, o truco para que saia perfecto está na temperatura do leite.
Se quentas de máis o leite, perderá esa textura cremosa que tanto nos gusta aos larseiros. O ideal? Non superar os 65ºC para evitar que a escuma perda a súa consistencia, e para iso os nosos leites de Pastoreo obtidos de vacas que pacen en liberdade son perfectos. 😉
A curiosa historia de como se inventou o capuchino
Seguro que algunha vez preguntácheste de onde vén o nome de “capuchino”. Pois ben, a súa orixe ten unha historia bastante curiosa. A palabra capuchino provén dos monxes capuchinos, que se caracterizaban polos seus hábitos marróns, case idénticos á cor que adquire o café ao mesturarse coa escuma do leite.
Estes monxes non adoitaban levar a carapucha dos seus hábitos, polo que en Italia chamábanos scappuccini, que significa desencarapuchados.
A pesar de que o nome do noso café é italiano, o primeiro capuchino fíxose fóra de Italia, en Viena. Este primeiro capuchino serviuse nun local vienés, e a súa cor, similar ao dos hábitos dos frades, foi o que inspirou o seu nome.
Ingredientes para un capuchino 100% caseiro
- 200 ml de leite de Pastoreo enteiro Larsa
- 30 ml de café
- Un chisco de cacao en po ou canela
Que utensilios vas necesitar?
- Unha cafeteira
- Un escumador de leite
- Unha pota pequena
- Unha cunca
Como facer o capuchino en casa paso a paso
Como en calquera receita, o primeiro que debes ter en conta para preparar un bo capuchino é contar con todos os ingredientes e utensilios necesarios. Unha vez que teñas todo, podemos poñernos ao choio.
- En primeiro lugar, imos facer un expreso. Se temos unha cafeteira exprés, usámola para obter un curto de café intenso e delicioso. Se non temos unha, non pasa nada, podemos empregar unha cafeteira italiana. O máis importante é que o café estea ben concentrado.
- Agora quentamos o leite nunha pota pequena ata uns 65 ºC, sen deixar que ferva, para logo poder acadar a textura cremosa da escuma.
- Unha vez teñamos o leite quente, escumámolo. Coa axuda dun escumador eléctrico ou manual, creamos unha escuma densa e cremosa.
- Para rematar, montamos o capuchino. Primeiro vertemos o expreso nunha cunca ancha. Deseguido, agregamos o leite quente, verténdoo con coidado para que non se mesture demasiado rápido co café e, coa axuda dunha culler, colocamos a escuma do leite por enriba, formando unha capa grosa e cremosa.
- Para decorar, empoeiramos cun pouco de cacao en po ou canela para darlle un extra de sabor.
- E listo! Agora xa temos un capuchino digno dunha cafetería, feito na casa e co sabor auténtico do noso leite de Pastoreo.
Truquiños larseiros
- Se non tes un escumador, non te preocupes: podes usar un frasco de cristal. Só tes que verter o leite quente no frasco, pechalo ben e axitalo con forza durante 30 segundos.
- O noso leite de Pastoreo enteiro é perfecto para facer unha boa escuma debido ao seu contido en graxa, o que o fai moito máis cremoso que outros leites, conseguindo unha textura perfecta para o teu capuchino.
Outras formas de gozar dun bo capuchino
Se queres sorprender aos teus convidados ou simplemente mudar un pouco a receita, proba as seguintes variacións:
- Capuchino con leite de Pastoreo semidesnatado sen lactosa: se es intolerante á lactosa, non tes por que renunciar ao delicioso sabor dun bo capuchino. Elabora a receita co noso leite sen lactosa e obterás a mesma cremosidade.
- Capuchino frío: Para os días calorosos, podes preparar un capuchino frío. Só precisas arrefriar o café con xeo e escumar o leite frío.
- Capuchino cun toque máis doce: Se es máis lambón, agrega un pouco de sirope de vainilla, caramelo ou abelá para dar un toque especial ao teu capuchino.
Sen dúbida, o segredo está no leite
Non é por nada, pero se hai un ingrediente que pode marcar a diferenza no teu capuchino caseiro, ese é o noso leite de Pastoreo. En Larsa, apostamos por un leite de Pastoreo auténtico, obtido de vacas que gozan en liberdade durante polo menos seis horas diarias e que se alimentan de maneira completamente natural, a base de herba dos mellores pastos galegos e complementos naturais que os nosos gandeiros recollen coidadosamente. Porque como di unha das nosas últimas campañas, “Non é o mesmo”, todo o leite de Larsa procede do Pastoreo. Por iso, marchamos pa Larsa.
Por todo isto, Larsa foi recoñecida como a primeira marca de leite en Galicia con certificación de Pastoreo, refrendada polo selo SGS, líder mundial en inspección e verificación. 😉